ArmDaily.am-ը շարունակում է «Խորհուրդներ սեքսոլոգից» շարքը, որի շրջանակներում սեքսոպաթոլոգ, բ.գ.թ. դոցենտ Սևադա Հակոբյանի հետ զրուցում ենք մեր ընթերցողներին հուզող կարևոր հարցերի մասին:
Այս անգամ փորձել ենք պարզել՝ որոնք են հղիանալու համար նպաստավոր դիրքերը, ինչ կարելի է անել շուտ հղիանալու համար, արդյոք կարելի է հղիության ընթացքում սեքսով զբաղվել, և ինչքան ժամանակ հետո կարելի է անհանսգտանալ, եթե երեխա չեն ունեում։
Ինչ դիրքով և որ օրերին սեքսով զբաղվել հղիանալու համար։ Ընդհանրապես, ինչ անել շուտ հղիանալու համար. օրինակ՝ դեղորայք, վիտամիններ, հատուկ սննդակարգ։
Նախ, առաջին հերթին պետք է ասել, որ զույգը չպետք է կենտրոնանա այսպես կոչված հղիության համար բարենպաստ օրերի վրա, քանի որ դա լրջորեն խաթարում է ամուսնական սեքսուալ ներդաշնակությունը, ավելին, կարող է հանգեցնել տարբեր սեռական խանգարումների՝ ամուսնու մոտ էրեկցիայի խանգարում, վաղաժամ սերմնաժայթքում, կնոջ մոտ անօրգազմիա:
Կնոջ հավանական հղիության օրերն են ձվազատման օրը և դրան հաջորդող օրը, այն տեղի է ունենում հիմնականում դաշտանային ցիկլի 12-14 րդ օրերին: Հարաբերությունից հետո խորհուրդ է տրվում կնոջը 1-2 ժամ մնալ անկողնում՝ մեջքի կամ որովային վրա պառկած դիրքում, քանի որ գտնում են, որ այդ դիրքերը ավելի նպաստավոր են հղիության համար:
Որևէ հատուկ դեղորայք գոյություն չունի շուտ հղիանալու համար, սակայն անհրաժեշտ է հղիություն պլանավորելուց առաջ թե՛ կինը և թե՛ ամուսինը բացառեն վնասակար սովորույթները, ընդունեն առողջ, վիտամիններով և միներալներով հարուստ սնունդ:
Բեղմնավորումից որքան ժամանակ հետո կարելի է իմանալ հղիության մասին։
Հղիության մասին խոսող առաջին նշաններից է կնոջ դաշտանի ուշացումը, այն պետք է սկսի ձվազատումից մոտ 14 օր հետո, եթե արձանագրվում է հղիություն, ապա այն ուղղակի չի սկսում: Հղիության թեստերի կիրառումն այդ դեպքում հաստատում կամ հերքում է փաստը:
Հղիության ընթացքում կարելի՞ է սեքսով զբաղվել։
Ընդհանրապես չկան հղիության ընթացքում սեռական կյանքով ապրելու սեքսոլոգիական հակացուցումներ:
Ավելին, երբ զույգերը խուսափում են երկարատև ժամանակահատված սեռական կյանքով ապրել, կարող են առաջ գալ որոշակի սեքսուալ խնդիրներ՝ պայմանավորված սեռական ֆունկցիայի ապամարզվածությամբ: Սեքսով ապրելու արգելք կարող է լինել, երբ առկա են հղիության որոշակի մանկաբարձա-գինեկոլոգիական բարդություններ կամ ռիսկեր:
Ցիկլի քանի օր ուշացումը կարող է հիմք լինել հղիության թեստ անելու համար։
Դաշտանի մեկ օր ուշացման դեպքում նույնիսկ կարելի է կիրառել հղիության թեստ և հաստատել կամ հերքել հղիության փաստը: Սակայն հաստատման առավել վստահելի մեթոդները կիրառվում են ավելի ուշ շրջանում:
Ամուսնությունից ինչքան ժամանակ հետո կարելի է անհանսգտանալ, եթե երեխա չեն ունեում։
Ընդհանրապես համարվում է, որ զույգի մոտ երեխա չունենալը որպես խնդիր է դիտարկվում, եթե ամուսնական կյանքի մեկ տարի և ավելի ժամանակահատվածում չի արձանագրվում հղիություն: Սակայն, կարծում եմ, որ պետք է նախապես կատարել որոշակի անհրաժեշտ հետազոտություններ՝ հասկանալու համար արդյոք անհատի մոտ առկա են վերարտադրողական համակարգի խնդիրներ թե ոչ, քանի որ վաղ հայտնաբերման պարագայում հնարավոր է առավել բարձր արդյունավետությամբ կարգավորել խնդիրները:
